Manarimaan ita ti panagimbestigar iti National Bureau of Investigation (NBI) kadagiti nangiwaras iti peke a medical record ni President Ferdinand Marcos Jr.
Sigun kenni NBI Acting Director Lito Magno, mabalin nga ipatuludanda ti subpoena ti vlogger a ni Jack Argota a maatap a maysa kadagiti nangiwaras iti nasao a rekord kasta metten dagiti daduma pay a nangi-share iti palso nga impormasyon.
Daytoy ket tapno mangngegan metlaeng ti bennegda tapno maipaay ti umno a tignay para kadagitoy.
Kagiddan dayta, nagpalagip ti nasao nga opisyal nga iti paglintegan iti Pilipinas ket nainget a maiparit ti panangiwaras iti malisyoso ken makadadael iti kapada nga indibidwal nga statements wenno damag pakairamananen ti cyberlibel.
Maipalagip nga immunan a kinondenar ti Presidential Communications Office ti panagwaras ti peke a dokumento seknan iti medical examination ti presidente.
Inladawanda daytoy nga irresponsable, panangallilaw ken nalawag a panaglabsing iti karbengan ni President Marcos Jr. iti privacy.
Malaksid iti dayta, maysa pay daytoy a nagtaudan ti awan an-anayna a panakaalarma ti publiko ken panakadadael ti talek kadagiti institusyon.
