BAGUIO CITY – Ipalpalagip manen ti Environmental Management Bureau (EMB)-Cordillera kadagiti politiko ti panagbalinda a responsable iti umno a panangibelleng ti campaign materials nga aramatenda iti campaign period.
Sigun kenni Regional Director Maria Victoria Abrera, maysa kadagiti nagbalin a parikutda kadagiti napalpalabas a tawen ti agkaiwara a campaign materials sakbay ken kalpasan ti eleksion.
Kinunana a kabinnadangda dagiti personnel ti COMELEC, PNP ken DOH iti panagwanawan tapno maipasigurado a masursurot ti RA 9003 wenno ti “Ecological Solid Waste Management Act of 2000″ partikular ti panagaramat dagiti kandidato ti environmental friendly a posters.
Inayonna a responsibilidad ti lokal a gobierno ken dagiti politiko a mangipatungpal ti umno a panangibelleng ti basura kabayatan ti campaign period.
Imbinglay ni Abrera nga iti agdama ket awan pailaeng ti nawanawananda a kandidato a naglabsing iti nasao a linteg sipud nangrugi ti campaign period dagiti nasional a kandidato.
Nupay kasta, impanamnamana nga ingetanda pay ti panagwanawanda nangruna ta umadanin ti campaig period dagiti lokal a kandidato.
