BAGUIO CITY – Nagturongen sadiay Cantanduanes Island ti Power Restoration Rapid Deployment Task Force manipud iti Benguet Electric Cooperative (BENECO) ken Mountain Province Electric Cooperative (MOPRECO).
Sigun kenni BENECO Consumer Welfare Officer Eric De Guzman, ti response team ket kas sungbatda iti apela ti National Electrification Administration ken Philippine Rural Electric Cooperatives Association a panakabukel ti task force a tumulong iti panakaitarimaan dagiti nadadael a distribution facilities gapu kadagiti bagyo a Rolly ken Quinta, partikular sadiay Catanduanes ken Camarines.
Mangnamnamada a makatulong ti naipatulod a response team iti napartak a panakaisubli ti kuryente kadagiti lugar a dinalapos dagiti napalabas a bagyo.
Kinunana a bukbuklen ti 13 a linemen ti BENECO ken 3 a linemen ti MOPRECO ti nasao a response team manipud ditoy Cordillera iti panangidaulo da Engr. Percivall Aspilan ken Engr. Mark Amisola ti BENECO.
Sigun kenkuana, makabulan nga agtalinaed ti response team sadiay Bicol Region.
Imet pay ti grupo ti maysa a boom truck ken dua a service pick-ups nga aramaten dagitoy.
