Ipapati iti Independent Commission for Infrastructure (ICI) nga ipatungpal ti restitution wenno panangrekoberda kadagiti assets dagiti indibidwal a karaman kadagiti naanomalyaan a flood control projects.
Sigun kenni ICI Chairman Andres Reyes Jr., saan nga umdas nga hustisya laeng ti magun-od nu di ket kasapulan metlaeng ti restitution wenno panangrekoberda kadagiti pondo nga imbulsa dagiti sumagmamano a para koma iti pagnumaran dagiti umili.
Impetteng ni Reyes nga amin dagiti naigatang kadagiti luxury items dagiti karaman iti anomalya ket ipapatida a maisubli kadagiti umili.
Ti imbaga ni Reyes ket kasaruno ti panangkumpirmar ti special adviser iti ICI a ni Rodolfo Azurin Jr. a nakolektardan ti umdas nga ebidensya tapno maipilaan iti kaso dagiti agassawa a kontraktor a da Sarah ken Curlee Discaya.
Iti baet nga immunan nga impeksa dagiti agassawa a saan dagitoyen makitinnulong iti nasao nga independent panel, kinuna ni Azurin a maituloy latta ti imbestigasyon.
Innayonna nga umdasen ti ebidensya a naalada tapno maipilaan iti kaso dagiti nasao nga agassawa nangruna ket naduktalanda a dagitoy ket karaman iti 1,000 a kontrata iti Department of Public Works and Highways (DPWH).
