BAGUIO CITY – Inladawan ni Baguio Mayor Benjamin Magalong a kritikal ita a lawas gaputa ditoy a rumwar amin a resulta dagiti confirmatory tests dagiti persons under investigation (PUIs) ditoy siudad.
Sigun kenkuana, adda pay ti uppat a kaso ti ‘highly suspicious’ wenno maatap a PUIs iti COVID-19 nga iti agdama ket nainget a mabambantayan.
Innayonna a maysa metlaeng a pimmusay ti addaan ‘high indication’ wenno napigsa nga indikasyon iti COVID-19.
Gapu iti daytoy, impetteng ni Mayor Magalong ti panagsurot iti social distancing.
Inyunay-unayna a daytoy ti kasamayan wenno kasayaatan a panglaban iti COVID-19 a kas iti inaramid ti South Korea, China, Macau ken Singapore malaksid pay iti containment measures.
Ag-self quarantine met ti dua a department heads iti City Hall a naaddaan ti close contact iti maysa kadagiti highly probable COVID-19 suspects a pimmusay.
Karaman pay a nabilin nga ag-self quarantine dagiti personnel dagiti nasao nga opisyales.
Imbilin metlaeng ni Mayor Magalong ti panaka-disinfect dagiti dua a disso iti City Hall.
