--Ads--
BAGUIO CITY – Ur-urayen laengen ni Mayor Mauricio Domogan ti resulta ti confirmatory test iti lima nga empleyado ti City Hall a nagpositibo iti iligal a droga.
Kinunana a naipaayen kenkuena ti resulta ti drug test dagiti nasao nga empleyado ngem agingga ita ket awan pay ti resulta ti confirmatory test dagitoy.
Gapu iti daytoy, nagkedked ti mayor a mangiwararawag iti kinasiano dagiti nasao nga empleyado.
Immunan nga impakaammo ti Philippine Drug Enforcement Agency Cordillera a nalpasen ti confirmatory test kadagiti nasao nga empleyado ti siudad.
Impanamanma pay ni mayor Domogan a tutukanna ti nasao a pakaseknan apaman a malpas dagiti amin nga aktibidad ti Panagbenga 2017.
