Kidkiddawen ti pannakangiwat ti impeachment prosecution team iti Office of the Ombudsman nga urayenda ti resulta ti impeachment trial ni Vice Presidente Sara Duterte, sakbay a mangikeddeng iti rekomendasion ti Kamara a mangipila iti plunder ken dadduma pay a kaso kontra kenkuana.
Dinakamat ni Atty. Antonio Bucoy ti linteg a mangibagbaga a ti Office of the Ombudsman ket addaan iti disciplinary authority kadagiti amin nga elective ken appointive officials ti gobierno, malaksid kadagiti opisial, a mabalin laeng a maikkat babaen ti impeachment.
Nakalanad pay iti linteg a ti Office of the Ombudsman ket addaan ti bileg a mangimbestigar iti saan a nasayaat nga inaramid ti maysa nga opisial iti opisinann a maikkat babaen ti impeachment.
Idi napalabas a lawas, imbilin ti Ombudsman a sungbatan ni Duterte ti plunder ken dadduma pay a kaso, nga inrekomendar ti Kamara a maipila kontra kenkuana gapu iti mapapati a saan nga umno a panagaramat ti confidential funds.
Inyebkas ni House Committee on Good Government and Public Accountability Chairperson Rep. Joel Chua ti pannakasdaawna iti napartak a panagtignay ti Ombudsman, a tallo laeng nga aldaw ti kasapulan.
