BAGUIO CITY – Maur-uray ti resulta dagiti naipatungpal a dengue fogging, panagdalos, ken daduma pay nga aktibidad nga impatungpal dagiti barangay officials, volunteers, ken health workers tapno lapdan ti panagraira iti dengue idiay La Trinidad, Benguet.
Sigun kenni Mayor Romeo Salda, maisingsingasing ti panangideklara iti state of calamity iti nasao a munsipyo ngem masapol pay nga urayen dagitoy ti resulta dagiti nadakamat nga aktibidad kalpasan ti uppat a lawas.
Posible met a maangay manen ti taripnong dagitoy ken ti health board seknan iti panakaideklara iti state of calamity kagiddan ti manaynayonan a bilang dagiti pumuspusay.
Iti sabali a bangir, naduktalan nga adu ti itlog ti lamok kadagiti drums, timba, ken naaramat a pilid babaen iti naisayangkat a larva survey ken agparparang a maysa daytoy kadagiti kangrunaan a rason iti nangato a bilang iti dengue iti nasao a munisipyo.
Kabayatanna, imbinglay ni Mayor Salda nga adu dagiti pagadalan, barangay, ken business establishment ti nagkiddaw iti panakaipatungpal iti fogging.
Nupay kasta, insingasing ti mayor a nasaysayaat nu mangipatungpal dagitoy ti search and destroy.//Bombo Rob Dominguez
