BAGUIO CITY – Nairuaren ti resulta ti otopsiya iti bangkay ti 8-anyos nga ubing a napapatay iti main library sadiay Jose Abad Santos, Baguio City idi napalabas a lawas.
Sigun kenni PSupt. Rodrigo Leal, medico legal ti PNP-SOCO Baguio-Benguet, pimmusay ti ubbing gapu iti nakaro a traumatic injury.
Naduktalan a napitpit ti rupa ti ubing gaputa nadunor ti mata, muging ken panga daytoy.
Posible met laeng a nabugbog ti ubing gapu kadagiti dunor iti barukongna.
Maipalagip a nabigbig ti nakemmeg a suspek a ni Randy Doria, 26-anyos ken inaklonna a nasakit ti nakemna iti ama ti biktima.
Kabayatanna, pinaglibakan ti ina ti nasao nga ubing ti waragawag ti suspek a kadkadwana nga agtaktakaw ti ama ti nasao nga ubing.
Sigun kenni Cristina Antipuesto, agbarkada ti suspek ken asawana ngem impettengna a saan nga agtatakaw ti asawana ken saan a pudno a nagramot ti gura ti suspek gapu iti saan a patas a panagbingay dagitoy iti tinaktakawda.
Kinunana a pudno nga adda ti napalabas a susik ti suspek ken ti asawana ngem ti ammoda ket narisoten daytoy ken saanda a ninamnama a ubing ti nakaidas-alan ti pungtot ti suspek.
