BAGUIO CITY – Pinaglibakan ti video learning platform a Nas Academy ti resulta ti imbestigasyon ti National Commission on Indigenous Peoples (NCIP) – Cordillera nga onerous wenno nadagsen unay para kenni Kalinga traditional tattoo artist Apo Whang-od ti maibagbaga a kontrata iti nagbaetan dagitoy.
Iti statement ti platform, kinunada a saan a pudno a napaayda a mangala iti pammaluboS ni Whang-Od ken saan a pudno a saanda nga impalawag dagiti linaon ti kontrata.
Iti met interview ti Bombo Radyo Baguio, tinakderan ni NCIP-CAR Regional Director Atty. Marlon Bosantog ti resulta ti nagbalin nga imbestigasyonda.
Impettengna a mismo a ni Apo Whang-od ken ti kaanakan daytoy ti nangibaga nga awan ti naipalawag kadakuada kadagiti probisyon ti kontrata ken saanda nga ammo daytoy.
Nupay kasta, inaklonna a saanna a maibaga no saan a pudno ti video nga impablaak ti Nas Academy a pakakitaan iti panangikabil ni Apo Whang-od iti thumb mark daytoy iti maibagbaga a kontrata.
Iti baet daytoy, dinakamat ni Atty. Bosantog nga adda met ti video ti insayangkatda a validation ken iruardan to iti publiko iti umno a panawen.
Innayonna nga agserbi to nga ebidensia ti nasao a video iti kanito nga adda ti legal nga aksion a maaramid.
