Nakabalud ita ni retired Police Colonel Royina Garma idiay Estados Unidos gapu iti mapapati a money laundering ken panaglabsingna ti human rights mainaig iti Magnitsky Act.
Daytoy ket sigun kenni Justice Secretary Jesus Crispin Remulla.
Ti dakdakmaten ni Remulla ket ti Global Magnitsky Human Rights Accountability Act a naipasa idi 2016 maipapan kadagiti pannusa a naipaulog kadagiti panaglabsing iti karbengan ti tao ken korapsion sadinnoman a paset ti lubong.
Dinakamatna ni Garma nga ad-adalenda ti Mutual Legal Assistance in Criminal Matters (MLAT) iti nagbaetan ti Pilipinas ken Estados Unidos tapno maipasubli ni Garma.
Iti agdama, awan pay ti komento ti kampo ni Garma seknan iti nasao a banag.
Maipalagip a kinemmeg dagiti otoridad idiay Estados Unidos ni Garma idi Nobiembre 7 gapu iti kanselado a visa daytoy.
Mainaig iti dayta, impakaamo ti abogado ni Garma a ni Atty. Emerito Quilang nga awan ti panggep ni Garma nga aglimmeng idiay Estados Unidos ken kinunan nga awan ti aniaman a pakaseknan ti visa daytoy idi pimmanaw iti Pilipinas.
Itay laeng kallabes, nagtestigo ti sigud a police official ken general manager ti Philippine Charity Sweepstakes Office iti sidong ti administrasion ni sigud a President Rodrigo Duterte.
Impakaamona ti kinasiasino ni sigud a President Duterte idi May 2016.
Dinakamat pay ni Garma a ni Duterte ti nangibaga kenkuana nga agsapul daytoy ti kameng ti Iglesia Ni Cristo a mangidaulo iti pannakaiyemplentar ti Davao model iti Pilipinas—maysa a reward system para iti pammapatay kadagiti suspek iti iligal a droga.
Ngem pinaglibakan amin ni sigud a President Duterte ti pammabasol.
