BAGUIO CITY – Kasapulan a makikoordinar dagiti OFWs manipod Abra a simmangpet ditoy pagilian manipod iti March 16 agingga April 15 iti OWWA Abra tapno masukon dagitoy.
Sigun kenni Governor Joy Bernos ti probinsia ti Abra, nasken nga ipakita dagiti OFWs ti certificate of completion a mangpaneknek a nakompletodan ti 14 nga aldaw a quarantine kadagiti otoridad.
Inlawlawagna nga iti kanito a nakasangpetdan sadiay Abra, maipasidong dagitoy iti municipal isolation unit ken dumalanda iti rapid test kalpasan ti 7-days, ket no nagnegatibo dagitoy iti nasao nga eksaminasyon ket mabalindan nga agawid iti pagtaenganda.
Kabayatanna, maipilaan iti kaso ti hepe ti Manabo MPS ken dagiti kakadwan kalpasan a naduktalan a sinukonda ti maysa nga OFW sadiay San Juan La Union no sadino inaramatda ti police car ken saanda a nakikoordinar iti LGU ken ti RHU.
Mainaig iti daytoy, saan a mapalubusan nga agawid dagiti stranded a residente ti Abra iti nagduduma a lugar.
Nupay kasta, inyunay-unay ni Bernos a maipaayan ti ayuda kadagiti stranded Abreños iti ruar ti probinsia babaen iti money remittance.
