BAGUIO CITY – Dead on arrival ti maysa a rider kalpasan a naidungpar ti iman-manehona a motorsiklo iti concrete barrier sadiay Brgy. Comillas North, Cervantes, Ilocos Sur idi alas siete ti rabii ti Abril 16.
Nabigbig ti biktima a ni FREDDIE BAYAG-O LAT-OG, 30-anyos, baru ken residente ti Brgy. Sadsadan, Bauko, Mt. Province.
Maibasar iti report, nirespondean dagiti otoridad ti vehicular traffic accident a napasamak iti Cervantes-Mankayan road partikular iti nadakamat a barangay.
Iti inisyal nga imbestigasyon, dumaldalyasat ti biktima iti amianan a direction ti Mankayan-Cervantes road idi napukawan daytoy ti kontrol iti motorsiklo agingga a naidungpar iti concrete barrier.
Nagresulta daytoy iti pannakatnag ti rider ken ti motorsiklo iti agarup 20 feet ti kangatona a rangkis.
Dagus a naiturong ti biktima iti Bessang Pass District Hospital Cervantes Ilocos Sur ngem naideklara kas dead on arrival. cd
