Naibakuit ti rinibribu a tattao idiay Jakarta, Indonesia gapu iti napasamak a panaglayus, ken posible nga agtultuloy ti napigsa a panagtudtudona inton sumaruno a lawas.
Ti napigsa a panagtudtudo sipud pay idi Lunes ti nangtignay ti layos agingga iti tallo a metro iti uneg ken aglawlaw ti Jakarta, sigun iti disaster agency ti nasao a pagilian.
Gapu iti panaglayus, saanen a mapagnaan dagiti dalan, ken nalned ti nasurok a 1,000 a balay ken adu a kotse.
Impangato met ni Jakarta Governor Pramono Anung iti maikadua ti alert level ken kiniddawna ti lokal a gobierno sadiay a mai-activate ti water pumps tapno mapababa ti danum manipod iti nalayus a lugar ken mangisayangkatda ti weather modification operations–wagas a panangikarga kadagiti salt flare kadagiti ulep tapno mangtignay iti tudo sakbay a makadanonda iti daga.
Dagiti umili a naibakuit ket agtaltalained paylaeng kadagiti pagadalan, mosques ken simbaan.
