BAGUIO CITY – Naklaat ti lokal a gobyerno ti Baguio City kalpasan ti killaat a panagsangpet dagiti rinibribu a turista iti siudad idi Marso 13, aldaw ti sabado.
Sigun kenni Mayor Benjamin Magalong, nangatngato daytoy a bilang no idilig idi napalpalabas a bulan a dumanon laeng iti 300 aggingga 600 a turista ti sumangsangbay ditoy siudad.
Kinunana a dakkel ti maitulong daytoy iti biyang ti ekonomiya ngem inaklonna a kritikal met daytoy iti benneg ti public health standards.
Nupay kasta, impanamnamana a nainget a masurot dagiti minimum health standards kabayatan ti panagngato ti bilang dagiti turista.
Kidkiddawenna met ti koordinasyon dagiti nagduduma nga establisyemento nangruna kadagiti hotel ken restaurant a mangimuntarda iti bokod dagitoy a testing center para kadagiti turista nga agturong sadiay.
