Inwaragawag ti United Nations AIDS agency a posible a dumanon iti 2,000 a baro nga impeksion ti HIV iti tunggal aldaw ti mailista iti intero a lubong ken ngumato iti sangapulo a daras ti matay no saan a maisubli wenno masukatan ti pondo nga insardeng ti Estados Unidos.
Itay laeng nabiit, insardeng gamin ni United States President Donald Trump ti dandani amin a tulong kadagiti ganggannaet idi nagtugaw daytoy iti takem idi Enero baente.
Kalpasan ti sumagmamano nga aldaw, kinuna ti State Department a ti “life-saving HIV work” iti sidong ti President’s Emergency Plan for AIDS Relief (PEPFAR) ket agtuloy.
Ngem ti pannakasinga ti pondo iti salun-at ken ti epektona kadagiti nalawlawa a serbisio ket addaan iti nakaro nga epekto kadagiti tattao nga agbibiag nga addaan iti HIV/AIDS, sigun kenni executive director Winnie Byanyima.
Maibasar iti kaudian a datos, dumanon iti 600,000 ti pimmusay a mainaig iti AIDS iti intero a lubong idi tawen 2023.
Maipalagip nga insardeng ti administrasion ni Trump a mangipaay ti pondo tapno maitunos iti polisiyana nga “America First.”
