BAGUIO CITY–Nagparti dagiti maseknan sadiay Keyston, Ucab Itogon, Benguet iti dua a baboy ken maysa nga aso ita nga aldaw kalpasan iti retrieval operation sadiay.
Sigun kenni Itogon Mayor Victorio Palangdan, impatungpalda daytoy a ritwal kas paset ti pammati dagiti kankanaey iti probinsya ti Benguet.
Kinunana a ti dua a baboy ket para iti ritwal a “pamakan” kas sagot para kadagiti pimmusay iti killer landslide ken tapnu saan dagitoy nga agtalinaed ditoy rabaw ti daga.
Kabaytanna, naaramat met ti aso para iti cleansing ritual wenno “daw-es” para kadagiti nangipatungpal iti search, rescue and retrieval operations tapnu awan iti agbalin a negatibo nga epekto kenkuada dagiti nakitada sadiay bayat iti panangipatungpalda iti nasao nga operasyon.
Dinmar-ay dagiti amin a nakipaset iti nasao nga operasyon sadiay kas iti PNP, AFP, BFP, LGUs, dagiti volunteer rescue groups, kabagyan dagiti biktima ken dagiti minero sadiay Itogon.
Mainaig iti daytoy, agtultuloy iti panagwanawan dagiti pulisya sadiay Ucab, Loakan, Gumatdang ken Ampucao, Itogon tapnu maipasigurado ti nainget a stoppage order a mangpaspasardeng kadagiti amin a small scale mining operation sadiay.
