BAGUIO CITY – Mangipatungpal iti simple a ritwal ti pamilya dagiti Special Action Force a pimmusay iti nadara nga engkwentro sadiay Mamasapano, Maguindanao kagiddan ti maikadua a tawen nga anibersaryo dagitoy ita nga aldaw.
Sigun iti ama ni PCI Gednat Tabdi a ni Garcia Tabdi, mangipatungpal dagitoy iti ritwal iti panakalagip ti nakaam-ames a Mamasapano Massacre.
Inlawlawagna nga iti kultura dagitoy ket kasapulan a mangidatonda iti baboy kas pananglagipda iti pimmusay nga anakda.
Nupay kasta, saandan a nakitaripong ti pamilya dagiti dadduma nga Igorot SAF trooper a pimmusay iti nasao nga operasyon gaputa addaan dagitoy iti bukod a wagas iti pananglagipda kadagiti pimmusay a kapamilyada.
Maipalagip a maysa ni PCI Tabdi kadagiti naipaayan iti Posthumous Medal of Valor iti panangidaulo daytoy iti Team 1 ti 84th SAF Company iti operasyon dagitoy sadiay Mamasapano, Maguindano idi Enero 25, 2015.
Mainaig iti daytoy, kinuna ti pamilya dagiti pimmusay a pulis a saanda pay laeng a naaklon ti nagbanagan dagiti annakda nangruna ta agingga ita ket saanda pay a nagun-od ti kalkalikagumanda a hustisya iti napasamak.
