BAGUIO CITY – Nangisayangkat iti Pusipos ti pamilia ti 97-anyos a tattoo artist ti Kalinga a ni Apo Whang-Od iti namitlo a daras.
Inlawlawag ni Kalinga Vice Governor James Edduba a ti Pusipos ket maysa a klase ti ritual a pakaparpartian dagiti taraken a nuwang.
Kinunana a patien dagiti residente sadiay Kalinga a babaen iti nasao a tradision ket maimbagan dagiti masakit a kapamilia dagitoy.
Sigun iti bise-gobernador, nagsagaba ni Apo Whang-od iti gurigor ken uyek ken masansan a makapasar daytoy iti asthma.
Nupay kasta, kinuna ti opisial nga idi laeng kalman ket nangrugi manen ti panag-tattoo ti nasao a mambabatek uray no adda paylaeng ti uyek daytoy.
Maipalagip a ni Apo Whang-od laengen ti sibibiag a mambabatek wenno tattoo artist sadiay Kalinga.
