BAGUIO CITY – Inyam-ammo ti maysa a Baguio-based local start-up iti tay-ak ti robotics ken automation ti nagduduma a robot a mabalin a makatulong iti panagliklik ti kontaminasyon ti COVID-19 kadagiti isolation/quarantine facilities ken kadagiti food and medical industries.
Sigun kenni Ammi Cherith Andales, owner ti Zaxxun Robotics, manarimaan ti pilot project dagitoy para iti research, development ken testing dagiti robot ken teknolohiya a makatulong iti kampanya kontra COVID-19.
Kinunana nga imparangda iti Baguio City Community Isolation Unit dagiti robots nga inaramidda a mabalin a katulongan dagiti medical frontliners tapnu maliklikan ti human-to-human contact wenno panaka-akar dagitoy iti virus kabayatan ti panangasikasoda kadagiti COVID-19 patients.
Inyam-ammoda ti robots a da COVID Avoid wenno COVOID ken Chako nga agpada a service mobile robots a mabalin a mangitulod iti agas ken taraon kadagiti silid dagiti pasyente.
Nupay kasta, ti robot a ni Chako ket addaan ti automated alcohol dispenser ken virtual communication features para iti contactless a komunikasyon ti doktor ken pasyente malaksid pay iti optional add-on function daytoy para iti decontamination ti silid nga inokupar ti rumwar a pasyente.
Imparangda pay ti Alpha Humanoid Robot a mabalin nga agserbi a giya iti panag-ehersisyo ken iti therapy dagiti naka-quarantine a pasyente a makapaspasar ti mild symptoms.
Innayon ni Andales nga isimsimpadan ti maysa kadagiti robotda tapnu ip-aramatda iti Baguio City Community Isolation Unit.
Sigun kenkuana, rinugiandan nga adalen ti ideya a panaka-aramat dagiti robot apaman a nakasangpet iti Pilipinas ti coronavirus, no sadino, puntiryada nga agbalin a relevent ken useful dagitoy, saan laeng a kadagiti ospital ken panganan, ngem ketdi, kadagiti hotel ken opisina.
Iyap-apelada pay ti panangsuportar ti gobyerno kadagiti babassit a techno companies ditoy Pilipinas a kas kaskuada.
Impeksada met ti kinasaganada a mangaramid iti kanayonan a robots tapnu makapataudda iti kanayonan a trabaho la ketdi adda dagiti indibidual wenno grupo nga agpa-aramid iti daytoy kas donasyon kadagiti ospital.
