BAGUIO CITY – Tarigagay ti Igorot fighter a ni Honorio Banario nga agbalin a two-division world champion iti ay-ayam a mix martial arts (MMA).
Sigun kenni ‘The Rock’, kayatna a mailista ti naganna iti pakasaritaan kas kaunaan a Filipino fighter a nagbalin a two-division champion iti MMA.
Kinunana a sakbay daytoy nga aginana wenno agretiro manipud iti MMA ket kayatna a maragpat ti nasao nga arapaapna.
Ad-adalenna met no kasapulan nga agay-ayam iti sabali a division kagiddan metlaeng ti panagdagsen ti timbangna gapu iti panakanayon ti tawenna ngem iti agdama ket nakatutok latta daytoy iti panagay-ayamna iti lighweight division.
Immunan a kinunana a saanna a sagwen ti agdama a lightweight champion a ni Eduard Folayang gaputa dagitoy ket maysa a pamilya iti Team Lakay.
Maipalagip a ni Banario ket nagbalin a featherweight champion idi 2013 ken iti agdama ket addaan daytoy iti professional MMA record a 12 wins ken 6 losses.
