Record-breaking a tawen para iti kape ti Pilipinas gaputa inlako ti nangabak iti Philippine Coffee Quality Competition (PCQC) para kadagiti babassit nga estate farms a ni Rodyio Tubal Tacdoy ti green coffee beans daytoy iti P9,900 tunggal kilo iti subasta a naangay kabayatan ti Philippine Coffee Expo itay nabiit.
Daytoy ti nangburak iti sigud a rekord a US$91 a naikeddeng bayat ti 2023 Philippine Coffee Quality Competition (PCQC).
Maikadua laeng a gundaway a simrek ti kape ni Tacdoy iti PCQC gaputa nakipaset metlaeng isuna idi napalabas a tawen.
Iti dayta a tiempo, nadakamaten ti mannalon ti Benguet kas kaubingan a mannalon a nakipaset idi agtawen laeng isuna iti 19.
Napadayawan ni Tacdoy iti kasayaatan a natural a naproseso nga Arabica iti nasao a pasalip.
Ti PCQC ket naorganisar a pasalip babaen iti panakitinnulongda iti Department of Trade and Industry ken ti Department of Agriculture.
Dagiti coffee beans manipod iti nagduduma a lugar iti pagilian ket naisubmitir para iti “roasting,” “evaluation” ken mairanggo babaen ti lokal ken ganggannaet nga eksperto iti kape.
Sigun kenni Mel Garcia, agdama a chairman ti Philippine Coffee Guild, napaliiwna a ti resulta iti agdama a tawen ket palagip kadagiti producers a saanda a komplikado gaputa kalpasan ti sumagmamano a tawen a panangala ti Mindanao iti kangatuan a puesto iti ranggo ti Arabica ken Robusta, panawenen tapno agsilnag ti Northern Luzon.
Bayat a ti Benguet ti nangala iti kangatuan a puesto, nasayaat met latta ti pannakairepresentar ti Mindanao dagiti kapeda babaen ti Davao, Bukidnon, ken rumrummuar a rehion ti kape, ti Lanao Del Sur.
