Naipatungpal ti dakkel a rollback iti presyo ti gasolina ken diesel ita nga aldaw, Hunyo 2, ngem saan pay a sigurado no maibaba met laeng ti pamasahe sigun kadagiti transport groups iti siudad.
Iti pannakiuman iti Bombo Radyo kenni Wilson Bumay-et Jr., presidente ti Jeepney Federation Baguio-Benguet, kinunana nga awan pay ti opisyal a nagsasaritaanda maipapan iti panangibaba iti pamasahe gapu ta agur-urayda pay iti steady wenno agtultuloy a panagbaba iti presyo iti langis.
Sigun pay kenkuana, obserbarenda pay iti sumagmamano nga aldaw ken kitaenda ti sitwasyon inton umay a lawas no mabalinen a maaddaan iti fare adjustment.
Inlawlawagna a pagnunumuanda pay laeng dagiti addang nga aramidenda tapno makitada dagiti mabalin a solusyon ti maipapan iti plete gapu ta sigun kenni Bumay-et, Jr., adaddalenda metlaeng dagiti addang a makapasayaat kadagiti commuters ken drivers.
Kinnidawna met iti publiko ti pannakaawat manipud kadagiti drivers pakairamanan dagiti commuters iti mannarimaan a sitwasyon. //BomboK
