Naipasidong iti State of Calamity ti Roxas City idiay Capiz gapu iti epekto ni bagyo a Ramil sadiay.
Naideklara daytoy babaen iti bileg iti resolusyon a naipaiyulog maitunos iti rekomendasyon iti City Disaster Risk Reduction and Management Council (CDRRMC).
Sigun iti nasao nga opisina,ti napigsa a panagbayakabak iti tudo gapu iti nasao a bagyo ket nangitunda iti nakaro a panaglayos kadagiti nagduduma a barangay.
Gapu iti dayta, nagbakwit dagiti residente, nadadael dagiti produkto agrikultura ken dagiti materyal a sanikua pakairamanan dagiti parapubliko nga imprastraktura.
Naipatungpal ti nasao nga addang para iti panakapapartak ti panakaipaay dagiti tulong, panagrekober, ken panakaipatungpal dagiti rehabilitation efforts.
Mainaig iti dayta, sigun iti report iti Bombo Radyo Roxas, dua nga indibidwalen ti pimmusay idiay Capiz kalpasan a nalmes dagitoy gapu iti panaglayos pakairamana iti maysa a content creator.
Kabayatanna, naisubli metten ti suplay iti kuryente kadagiti babbarangay iti nasao a siudad a temporaryo a napukawan gapu iti panagdalapos ti dakes a sasaaden iti panawen.
