BAGUIO CITY- Napalagipan manen dagiti pet owners wenno dagiti adda tarakenna nga ayup iti Baguio City nga agbalinda a responsable.
Kasaruno daytoy ti reklamo dagiti sumagmamano nga indibidual gapu kadagiti agkaiwara a rugit dagiti taraken nga aso ken pusa.
Iti pannakiuman ti Bombo Radyo kenni City Councilor Betty Lourdes F. Tabanda, kinunana a masapul nga agbalin a responsible pet owners kas ti umno panangtaripato, panangipaay ti umno a kulungan ken regular a panangdigus kadagiti taraken.
Maibasar iti Ordinance No.19-2021, masapul a maipaay dagiti amin a kasapulan dagiti taraken nga aso wenno pusa kas ti medical, umno ken umdas a taraon ken dadduma pay.
Malaksid iti dayta, nasken a dalusan ti rugit dagiti taraken ken itali a nalaing nangruna nu adda iti parapubliko a lugar tapno saan a makabulos ken saan a makaitunda iti aniaman nga insidente.
Innayon pay ni Tabanda a nasken nga ipabakuna dagiti taraken kontra iti rabies.
Dinakamatna a mamulta dagiti managbaybay-a nga pet owners iti P1,000 para iti umuna nga offense wenno mabalin pay nga alaen ti lokal a gobyerno ti taraken nu saan a mabayadan ti owner ti nasao a multa ken saanen a mabalin a masubli pay.
Impettengna met a nasken a makitinnulong dagiti barangay officials tapno nainget a maipatungpal ti nasao nga ordinansa.
