BAGUIO CITY – Umap-apela ti Department of Trade and Industry (DTI) kadagiti agtagikua kadagiti sari-sari stores iti probinsia ti Benguet ken iti siudad ti Baguio iti saan a panangipangato dagitoy iti presyo dagiti tagilakoda kagiddan ti manarimaan nga Enhanced Community Quarantine gapu iti COVID-19.
Iti interview ti Bombo Radyo Baguio, impetteng ni DTI – Baguio-Benguet Provincial Director Freda Gawisan nga ar-aramidenda met ti kabaelanda tapnu bantayan dagiti dadakkel a retailers iti saan dagitoy a panangipangato iti lakoda.
Kinunana a babaen iti daytoy ket standard met ti presyo dagiti rumwar a produkto dagiti dadakkel a retailers nga apan kadagiti sari-sari stores.
Gapu iti daytoy, kiniddawna kadagiti sari-sari store owners ti panakitinnulong dagitoy iti agdama a panawen ti krisis gapu iti COVID-19, partikular iti saanda a panangipangato iti presyo dagiti lakoda gaputa awan met ti panagngato iti ginatang dagitoy kadagiti dadakkel a retailers.
Inyunay-unay pay ni Gawisan a saan a ti agtiliw kadagiti overpricing ti panggep iti panagmonitor dagitoy kadagiti pagtagilakuan ngem ketdi, kitkitaenda met ti kaada ti suplay dagiti tagilako.
Inlawlawagna met nga uray iwanawanda dagiti sari-sari stores kadagiti barangay no iti ipapanawda ket agsubli metlaeng ti nangato a panagpresto ti maseknan a sari-sari store.
Inaklonna a sumagmamano kadagiti maaw-awatda a reklamo ti suksukimatenda nangruna no kabaelanda a turongen dagitoy ngem iti kaad-adu dagiti maaw-awatda ket saanda a maasikaso amin dagitoy.
