BAGUIO CITY – Saan nga irekrekomendar ni Mayor Franklin Smith ti panagdependar iti Global Positioning System (GPS) iti panagturong kadagiti pagpasyaran iti municipyo ti Atok nangruna kadagiti first time a sumarungkar sadiay.
Iti panakiuman ti Bombo Radyo kenni Mayor Smith, adun dagiti nailawlaw-an a dimmanon iti sabali a destinasyon gapu iti panagaramatda iti nasao a navigation system nu sadino nakaitunda pay daytoy iti panakaaksidente dagiti sumagmamano a turista.
Kagiddan dayta, inyunay-unay ti mayor ti panagsaludsod kadagiti umili wenno residente nu saan a kabisado ti dalan wenno direksyon gapu ta sisasaganada dagitoy a mangasistar kadagiti agdamag.
uray nu haan dagitoy kapulisan, agdamag kayo kadagijay umili a mismo ta honest da a mangiturong, mangisuro nu ayan nattoy a lugar ta dayta ngarod, jay kunak ngarod nga haanda met nga agkamang, haanda met agdamag…haan met narigat ti agdamag, dayta ti kayat tayo. ta ti kuna tayo ket madi tayo kayat nga adda ti mailawlaw-an.
Mainaig iti dayta, nagpakdaar ti mayor kadagiti motorista a saan a kampante dagitoy iti panagmanehoda gapu ta adda ti posibilidad a mapasaran ti panagtinnag dagiti bato wenno daduma pay a debris kadagiti kalsada kagiddan paylaeng ti panaglukneng ti daga nga intunda ti panagtudtudona.
Maiyunay-unay met ti panang-obserbar dagitoy iti road courtesy ken panangisindi kadagiti headlightsda nu naangep ti kalsada.//Bombo Rob Dominguez
