Inyunay-unay ni Commission on Elections Chairman Atty. George Erwin Garcia kadagiti kadidato ti panagtulnog dagitoy iti pagalagadan bayat nga opisyalen a nangrugi ita nga aldaw ti campaign period para kadagiti senatorial aspirants ken partylist representatives.
Malaksid iti panagtulnog kadagiti pagalagadan, maiyunay-unay metlaeng ti panagraem dagitoy iti publiko babaen iti saan a panagkampanya bayat ti wee hours gapu ta posible a makaistorbo daytoy iti panagturog.
Impetteng ti opisyal nga adda iti umno nga oras ken lugar iti panagkampanya.
Mainaig iti dayta, impanamnama ni Atty. Garcia a nainget nga imonitor ti poll body dagiti magastos dagiti kandidato iti panagkampanya dagitoy nu sadino, dinakamatna nga ipablaakda dagiti statement of contribution and expenditures (SOCE) dagiti amin a kandidato tapno maadal daytoy ti publiko.
Immuna metten a naipakaammo nga addaan iti bileg dagiti law enforcers nga arestaren nga uray awan iti arrest warrant dagiti indibidwal a maduktalan a manggangandat wenno mangipatpatungpal iti vote-buying ken vote-selling.
Kabayatanna, mangrugi met 45-day campaign period para iti local elections inton March 28 nga agleppas inton May 10.
