BAGUIO CITY–Inlawlawag ni Baguio City Councilor ken dadaulo ti Committee on Public Works ti konseho a ni Mylene Yaranon ti rason ti saan a panakaituloy dagiti sumagmamano a dadakkel a proyekto ti siudad.
Iti interview ti Bombo Radyo iti konsehal, kinunana a dakkel a nagepekto ti kasasaad ti ekomomiya ti siyudad nga intunda ti pandemya.
Imbinglayna a priyoridad ti lokal a gobierno ti Baguio City dagiti proyekto a mangsalsalwad iti salun-at dagiti residente ken ti panagsagana ti lokalidad kadagiti sumangbay a kalamidad.
Karaman kadagiti proyekto a tinutukanda ti pannakatarimaan dagiti sewerage systems ti siudad, rehabilitasyon ti Public Market ken ti Burnham Park.
Inlawlawag ti opisyal nga iti sumaruno a tawen ket manamnama a marugianen ti panakatarimaan ti merkado publiko ken puntiryada a marugian metten ti rehabilitasyon ti nalatak a parke ti siudad ita a tawen babaen iti panagtinulong ti Department of Tourism ken ti Tourism Infrastructure and Enterprise Zone Authority (TIEZA) ditoy lokalidad.
Sigun pay kenni Councilor Yaranon, matutukan ti panakapasayaat ti Children’s Park, ti Burnham lake ken ti Melvin Jones.
Nupay kasta, inaklona a maitantan paylaeng ti nabayagen a proyekto ti siudad a Road Widening gapu iti mapaspasaran a pandemya.
Saan metlaeng a maituloy ita ti panggep a panakaipasdek ti Parking Building sadiay Baguio Fire Station gapu iti kinakurang ti pondo.
Inlawlawagna a naaramat ti kaskenan a pondo iti panaggatang kadagiti kasapulan iti agdama a crisis.
Kasta pay a bimmaba ti makolkolektar a buis a nang-apektar iti maaramat a budget para koma iti nasao a proyekto.
