BAGUIO CITY – Impetteng ti grupo dagiti agilaklako ti pailaw iti Baguio-Benguet nga impalubos ni Tuba Mayor Clarita Sal-ongan ti panaglakoda iti masakupan ti Tuba, Benguet.
Iti interview ti Bombo Radyo Baguio, kinuna ni Agnes Montoya, dadaulo ti nasao a grupo a nagsuratda kenni Mayor Sal-ongan para iti kiddawda a panaglako ti pailaw iti nasao a munisipyo.
Kinunana a sakbay ti napalabas a holiday ket nga adda ti ‘note’ ti mayor iti suratda a nangipalubos iti panangirugida a mangiproseso kadagiti kasapulan a dokumento ken ti panagbayada iti local permit iti Tuba LGU.
Nupay kasta, idi Lunes ket agbayad kuman ti grupo da Montoya ngem naklaatda gapu iti panangisanod ti mayor iti pammalubos a naited kadakuada.
Iti baet daytoy, impeksana ti panangrespetona iti nagbalin a desisyon ti mayor ti ili.
Gapu iti napasamak, kinuna ni Montoya nga agbirukda laengen iti dadduma a wagas kas iti online selling tapnu mailakoda dagiti naaladan a pailaw nga ilakoda kuma no napatganda nga agpwesto sadiay Tuba.
