BAGUIO CITY – Saan a napabaruan wenno naituloy ti kontrata ti lima nga empleyado ti Public Order and Safety Division iti sidong ti City Mayor’s Office ti lokal a gobyerno ti Baguio City.
Nailanad iti suratda iti Bombo Radyo Baguio ti panangipeksada iti pakaseknanda ken inlanadda ditoy a napersonal ken napolitiko dagitoy isut gapuna a saanen a naituloy ti kontratada.
Inlawlawag met ni POSD Deputy Chief Daryl Kim Longid iti panakiyuman ti Bombo Radyo Baguio nga amin nga empleyado iti opisinada ket contractual basis wenno job order laeng nga agpaut iti innem a bulan isut gapuna nga ibasarda iti evaluation iti performance ti tunggal empleyado no maituloy ti kontrata daytoy wenno saanen.
Kinunana a dagiti naikkat nga empleyado ket nakaawat iti nababa nga evaluation ratings ken addaan ti negatibo a feedbacks manipud kadagiti nagduduma nga enforcers ken iti assessment dagiti team leaders dagitoy.
Kinunana pay nga addun dagiti naawat ti opisinada a negatibo a feedbacks ken reports manipud kadagiti umili seknan iti misconducts dagiti lima kabayatan ti panag-duty dagitoy kas iti panagaramat ti cellphone, panagsigarilyo ken dadduma pay.
Impettengna a dimmalan dagiti lima iti umno a proseso gaputa saan a basta-basta nga agikkat ti POSD kadagiti empleyadoda no awan ti basaran.
Innayona a nakiumanda pay kadagiti team leaders dagiti lima ngem nakarkaru pay a negatibo a komento ti naipadanun kenkuana isut gapuna a nagdesisyon ti lokal a gobyerno ti Baguio nga awan ti rason tapnu maituloy pay ti kontrata dagiti lima.
Nupay kasta, kinuna ni Longid a maawatanda met ti rikna dagiti lima gaputa naawanan dagitoy ngem impettengna a masapul nga akseptaren dagiti lima ti nagbalin a desisyon iti kontrata dagitoy.
