BAGUIO CITY- Naipanamnama iti saan a panangipatungpal ti grupo dagiti drivers ken operators ditoy lokalidad iti tigil pasada iti baet ti agtultuloy a panagngato ti presyo ti produkto a petrolyo.
Iti interview ti Bombo Radyo Baguio kenni Pat Evangelista, presidente ti asosayon dagiti transport group iti Cordillera ken Region 1, kinunana nga awan iti panggep dagitoy a mangipasardeng iti operasyonda.
Nupay kasta, kinunana a saanda a mapilit dagiti dadduma a drivers nu agsardengda nga ag-operate gapu iti nangina a krudo ken gasolina.
Gapu iti dayta, mangnamnamada a maited/maipaay koma iti kabiitan a panawen ti ayuda nga inyarigna kas limosda iti gobierno.
Mainaig iti dayta, kiniddawna pay iti pannakaipasa ti maysa a memorandum a naipila idi pay 2019 seknan iti pannakaipaima kadagiti regional offices ti Land Transportation and Regulatory Board ti desisyon a pannakaipangato iti pamasahe.
Kkinunana a gapu iti pannakaipangato iti central office ti LTFRB dagiti petisyon ket bumayag iti pannakatingiting daytoy.
Inlawlawagna nga ammo ken marikna dagiti regional offices dagiti rason kadagiti petisyon iti pannakaipangato ti plete.
Gapu iti dayta, kinunana a napinpintas latta nu adda kadakuada iti pannakaipaulog ti desisyon kadagiti petisyon iti pannakaipangato wenno pannakaibaba ti plete kadagiti parapubliko a luglugan.
