BAGUIO CITY – Manarimaan ti negosasion ti City Services Office idiay Pampanga kalpasan a naiserra ti landfill idiay Urdaneta City, Pangasinan a pakaiturturungan dagiti basura iti siudad ti Baguio.
Iti interview iti Bombo Radyo kenni Eugen Buyucan, dadaulo iti City Services Office iti siudad ti Baguio, kinunana a naiparit ti pannakaiturong ti basura idiay Urdaneta City gapu iti maatap a panaglabsing ti landfill management iti pagalagadan ti nasao a lugar.
Sigun kenkuana, naawatna ti surat manipud iti landfill management idiay Urdaneta City nga urnusenda paylaeng ti isyu sadiay.
Gapu iti dayta, inyuna-unay ti nasao nga Opisial kadagiti residente ti siudad a saanda paylaeng a mangiruar kadagiti basura iti schedule dagitoy agingga intun sumaruno a lawas.
Namnamaen ni Buyucan a makabirukda iti accredited nga Engineered Sanitary Landfill a mangipaay iti nababa ken napintas a serbisio.
Iti agdama, addan ti dokumento a maiturong idiay Pampanga para iti katulagan kadagiti pagpilianda nga Engineered Sanitary Landfill iti nasao a lugar.
Kabayatanna, inaklon ti nasao nga opisal a karit kadakuada dagiti basura iti Merkado Publiko.
Nupay kasta, prioridadda a kolektaren dagiti basura iti public market ken Central business district nangruna dagiti vegetable ken fruit refuse.
Maiturong daytoy idiay Irisan ken maipakan kadagiti black soldier fly.
Kabayatanna, inyunay-unay ni Buyucan nga anusan dagiti residente a saanda a mangiparuar iti basura angingga a makabirukda iti baro a Sanitary Landfill ti siudad.
Kidkiddawen ti nasao opisial ti kooperasion ken makitinnulong dagiti residente kadagiti maseknan nga otoridad.
Impetteng ti nasao nga opisial a makatulong dagitoy babaen iti panangimanehar kadagiti biodegradable babaen iti composting.//mp4
