BAGUIO CITY – Manarimaan ita ti inspeksion dagiti maseknan nga ahensia ken opisina ti gobierno kadagiti maob-obserbaran nga iligal a deep wells wenno pagbombaan ti danum iti siudad.
Iti panakiyuman ti Bombo Radyo Baguio kenni Baguio Water District (BAWADI) General Manager Engr. Salvador Royeca, kinunana a kabinnadangda ti National Water Sources Board ken ti Department of Environment and Natural Resources iti nasao nga addang.
Resulta daytoy ti napasamak a dialogo iti nagbaetanda ken kadagiti nadakamat nga ahensia ti gobierno.
Kabayatan ti inspeksion, kinuna ni Engr. Royeca nga imbestigaranda dagiti saan a rehistrado a deep wells ken ibalakadda ti panagalada iti permit tapno nawayada ngaa agoperate ditoy lokalidad.
Impettengna pay a nasken a makontrol dagitoy babaen iti kanayon a panangipalagipda a nasken ti legal a dokumento sakbay nga agoperate dagiti maseknan nga operators.
Sinungbatan met ni Engr. Royeca ti pakaseknan nga adda dagiti mataktakaw a metro ti danum ti BAWADI a mailaklako iti lokalidad
Kinunana a nupay nagtalna iti agdama dagiti mangal-ala iti metro a danum ket imbalaagna a saan a nalaka a mailako dagitoy gaputta addaan serial number ken adda ti pakakitaan a tagikua dagitoy ti opisina.
Nangikabilda metten kadagiti metroboxes tapno maliklikan ti panakatakaw dagiti nasao a banag.
