BAGUIO CITY – Agtultuloy ken ad-adda pay a kimmaro ti saan a nasayaat a kalidad ti danum iti Balili River.
Sigun kenni Environmental Management Bureau (EMB) – Cordillera regional director Reynaldo Digamo, daytoy ket iti baet ti implementasyon dagiti nagduduma a programa ken aktibidad dagiti maseknan nga ahensia ti gobyerno ken ti pribado a sektor tapnu madalusan amin a pagay-ayusan ti danum iti lokalidad.
Maibasar iti kaudian a monitoring report ti ahensia iti danum ti Balili River, nadanun ti fecal coliform ti ginasgasut a bilyon nga adayo a nangato unay manipud iti maitudtuding a kaadu ti coliform iti danum kadagiti river systems.
Sigun kenkuana, saan nga epektibo dagiti aktibidad a maipatpatungpal tapnu madalusan ti Balili River isut gapuna a panawenen tapnu subliyen manen dagiti stakeholders ti aktibidad dagitoy.
Innayonna a ti kasasaad ita ti danum ti Balili River ti mangipakpakita iti adu unay a bilang dagiti babbalay a direkta a mangibelbelleng iti sewerage waste dagitoy iti karayan malaksid pay iti panagadu dagiti pagtaraknan ti baboy a mangibelbelleng iti rugit ti baboy iti nasao metlaeng a karayan.