Electrical Ignition ti atapen dagiti autoridad a rason iti panaka-uram ti maysa nga establishmento sadiay Puguis, La Trinidad Benguet itay parbangon.
Sigun kenni SF02 Luis Balli, investigator ti Bureau of Fire Protection (BFP) -La Trinidad, overloaded ken saan a nasayaat ti panakaimuntar ti linya ti koryente a nangitunda iti uram.
Mapatta-patta a dumanon iti P90,000.00 ti imbati a dadael ti panaka-uram ti 60 square meters ti kalawana nga istraktura.
Immuna a naireport ti nasao nga insidente alas 12:42 ti parbangon ken naideklara ti fired out alas 1:10 ti parbangon kasaruno ti panagresponde dagiti bombero.
Awan met ti naipadamag a nadangran iti nasao nga insidente.
Kabayatanna, palpalagipan ti BFP-La Trinidad ti publiko a liklikanda a baliw-baliwan ti linya ti koryente dagitoy tapno maliklikan ti uram.
Sigun iti opisina, no adda pakaseknan dagiti umili iti koneksiyon ti koryente ket rumbeng nga agalada iti serbisyo dagiti professional electricians wenno dagiti miyembro ti BFP.
