BAGUIO CITY–Impangta ti City General Service Office ti saanda a panang-akop kadagiti basura kadagiti babbarangay iti siudad ti Baguio a saan a naisinasina wenno nagtungpal iti pagalagadan iti umno a waste segregation.
Sigun kenni Eugene Buyucan, dadaulo ti nasao nga opisina, daytoy ti makitkitada a solosyon tapnu ipaay dagiti umili ti kooperasyon dagitoy iti panakarisut ti parikut ti basura iti siudad.
Kinunana nga addan to ti gundaway nga ingetanda ti panakakolektar dagiti basura kadagiti babbarangay tapu makita metlaeng ti disiplina dagiti umili mainaig iti panaka-isinasina dagiti basura dagitoy.
Kabayatanna, iyap-apelana ti panagtungpal met dagiti vendors iti merkado publiko ti siudad iti implementasyon ti RA 9003 wenno ti Ecological Solid Waste Management Act of 2000 tapnu makatulongda iti panakadalus ti aglawlaw.
Dinakamatna a maysa dagiti vendors kadagiti saan nga agtungtungpal iti pagalagadan iti panangisinasina kadagiti basura.
Impetteng pay ni Buyucan a ti panakarisut ti parikut iti basura ket saan laeng a responsibilidad ti lokal a gobyerno ngem ketdi, tunggal umili iti maysa a lugar.
