BAGUIO CITY – Awan ti maidiaya a domestic helper para iti overseas employment iti maangay a a Job ken Business Fair inton May 1 ditoy siudad ti Baguio ken iti dadduma a paset ti pagilian.
Sigun kenni Patrick Rillorta, information officer ti DOLE-Cordillera, daytoy ti pammilin ni Presidente Rodrigo Duterte kenni Labor Secretary Silvestre Bello III.
Kinunana a gapu daytoy iti nagduduma a parikut, partikular ti panagabuso a sangsangwen ita dagiti Overseas Filipino Workers (OFWs) nga agtatrabaho kas domestic helpers iti nagduduma a paset ti lubong kas iti Kuwait.
Impalawagna a gapu iti nasao a banag ket kayat pay ti presidente a makontrol ti panagturong dagiti domestic helpers iti ballasiw taw.
Innayonna nga adu gamin dagiti recruitment agencies a manggungundaway kadagiti OFWs ken pagkukwartaanda laeng dagitoy.
Dinakamatna nga isimsimpa metten ti Central Office ti DOLE ti kaskenan nga addang tapnu marisut ti pakaseknan.
Imbalakadna pay a bayat ti panaguray dagiti interesaho nga agbalin a domestic helpers ket mabalin met nga agadal dagitoy iti TESDA tapnu ad-adda a mapasayaat ti skills dagitoy ken manayonan ti panaka-ammoda tapnu mabaelanda a makikompetensia sadiay ballasiw taw.
Maipalagip nga iti Job ken Business Fair inton May 1 ket pasetan ti 14 nga overseas recruitment agencies ken mangidiaya dagitoy iti overseas employment para kadagiti mannursuro ken dagiti dadduma a professional jobs para iti sumagmamano a paset ti Middle East, Europa ken Asya.
