BAGUIO CITY – Inlawlawag ni City Administrator Engr. Bonifacio Dela Pena dagiti sumagmamano a rason ti saanpay a panakaileppas ti panakatarimaan ti swimming pool iti Baguio Athletic Bowl.
Sigun kenkuana, naituding a mailepas koma ti proyekto idi napalabas a tawen nangruna ta nalpasdan ti measurement ti pool.
Inlawlawagna a rinugianda ti rehabilitasyon daytoy babaen pannakaiyurnos ti 50 meters distance ti pool tapnu maitunos iti standard para iti international events.
Nupay kasta, kinunana a saanda pay a maikarga ti lining/liner ti pool gaputta naksen a dagiti supplier ti mismo a mangikarga iti daytoy kas nakailanad iti kontrata ti supplier dagiti materyales a naaramat iti pannakatarimaan ti proyekto.
Kinuna pay ni Engr. dela Peña a saan a personal a makaumay ditoy pagilian ti supplier dagiti materyales gapu iti agtultuloy a pandemya.
Iti baet ti daytoy, kinunana a kinasaritadan dagiti kontraktor iti proyekto tapnu maipaayan ti solusyon wenno maisuro laengen kadakuada nu kasano a maisimpa dagiti liners tapnu malpasen ti proyekto. (report ni Bombo Brigit Marcasi)
