Maiyarig iti oversupply ti mapaspasaran dagiti Cut Flower Growers iti probinsya iti Benguet kadagiti naapitda a sabsabong iti agdama.
Iti panakiuman ti Bombo Radyo kenni Andy Colty Sr., maysa kadagiti Siyentistang Magsasaka ng Pilipinas, saan a napasamak ti pagam-amkan dagitoy a panakadadael dagiti mulada a sabong iti panagdalapos ti bagyo ngem nagmaay met a ti kasasaad dagiti kangrunaan a customerda ti nagbalin a parikut.
Sigun kenni Colte, agingga iti agdama ket awan pay kadagiti sukida manipod Bicol, Nueva Ecija,Bantangas, ken Pampanga ti nangipakaammo iti panagangkat dagitoy ti sabong para iti sumangbay nga All Souls’ Day ken All Saints’ Day.
Nupay kasta, mangnamnama ni Colte a sumangbay inton bigat dagiti gumatang kadagiti sabong nga stranded paylaeng kadagiti kalsada paturong iti Probinsya iti Benguet.
Mainaig iti dayta,kinuna ni Colte a posible nga ad-adda pay a bumaba ti presyo dagiti ilakoda a sabong iti baet nga addan ti bimmabaan daytoy iti agdama.
Innayonna a panggepda laengin a mailako dagiti apitda ken maisubli ti puunan wenno farm inputs dagiti flower growers rason a sumagmamano kadagitoy ti agturturong itan idiay Manila tapno idanon dagiti naapitda a sabong kadagiti mabalin wenno sukida a gumatgatang.
Kabayatanna, inlawlawag ni Colte nga awan ti pabpabasulenda iti agdama a sitwasyon ken maawatanda ti benneg dagiti sukida a nakaro a naapektaran iti panagdalapos ni bagyo a Kristine.//Bombo Rob Dominguez
