BAGUIO CITY – Nainagunaran ti Special Action Force (SAF) monument sadiay Lepanto National High School, Mankayan, Benguet.
Segun kenni PSupt. Mario Mayam-es Jr., 2nd Battalion SAF commander, ti nasao a monumento ket pammadayaw kadagiti 44 SAF commandos a napapatay sadiay Tukanalipao, Mamasapano, Maguindanao duwa a tawenen ti napalabas.
Kinunana nga amin a pagadalan iti sekondarya a nagadalan dagiti 44 SAF commandos ket maaddaan iti kapada a monumento.
Innayona a sadiay Lepanto NHS a nagadal da SPO1 Noel Golocan, PO1 Angel Kodiamat, ken ni PO2 Noble Kiangan.
Kalpasan ti misa a naipatungpal ket naipaayan met iti gundaway dagiti Mamasapano survivors a da PO2 Adolfo Andrada ken PO3 Christopher Lalan a mangipaay iti testimonya dagitoy.
Malaksid kadakuada ket nangipaay metlaeng iti mensahe ti pamilya dagiti SAF troopers a dimar-ay iti nasao nga inagurasyon.
