BAGUIO CITY – Ikararagan laengen ti Pamilya Tabdi daydi anakda nga elite trooper a pimmusay iti napasamak a masaker sadiay Mamasapano, Maguindanao idi January 2015 a nakatayan ti 44 a commandos ti PNP – Special Action Force a nangisayangkat ti Oplan Exodus.
Iti panakiyuman ti Bombo Radyo kenni Garcia Tabdi Jr., ama daydi PMajor Gednat Tabdi a commander ti 84th Special Action Company ti PNP-SAF a nangidaulo iti nasao nga operasyon, impeksana ti panakaupayda iti panangisakad iti kaso kontra kadagiti responsable.
Kinunana nga uray anya ti aramiden ti pamilya ti SAF 44 a lumaban para kadagiti pimmusay a kapamilyada ket awan ti mapasamak gaputa ti Korte Suprema ti nagdesisyon.
Dinakamatna nga uray adda ti apelada ket ti Korte Suprema met ti kangatuan a korte iti pagilian.
Maipalagip a pinasingkedan ti Korte Suprema ti desisyon ti Office of the Ombudsman a nangibasura iti kaso a reckless imprudence resulting in multiple homicide a naipila kontra kenni sigud a President Benigno Aquino III gapu iti napasamak a masaker.
Pinasingkedan ti Korte Suprema ti desisyon ti Ombudsman nga awan ti umno a rason tapnu makasuan da Aquino, sigud a PNP chief Alan Purisima ken sigud a PNP-SAF commander Getulio Napeñas Jr.
Nupay kasta, nailanad iti desisyon ti Korte Suprema a mabalin met a mangipila ni Ombudsman Samuel Martires iti baro a kaso kontra kenni Aquino sadiay Sandiganbayan.
Maipalagip a pinatgan ti Sandiganbayan ti petisyon ni Martires a maipalubos ti panangisanod ti opisinana iti Information for the Crime of Usurpation of Authority nga impila ni sigud nga Ombudsman Conchita Morales kontra kenni Aquino. (-with Bombo Florence Paytocan)
