BAGUIO CITY – Naawat ti Baguio City ti Safe Travels Stamp para iti Destination Category bayat a naawat ti maysa a hotel ditoy siudad ti kapada a pammigbig iti Entity Category manipud iti World Travel and Tourism Council ken iti Department of Tourism (DOT).
Paset daytoy ti panangbigbigda iti panangadaptar ti lokal a gobyerno ken dagiti tourism establishments kadagiti health and safety guidelines kabayatan ti agdama a pandemya gapu iti COVID-19.
Naamuan a ti Baguio City ti kaunaan a lokal a gobyerno iti Cordillera Region a nakaawat iti nasao a nalatak a pammigbig.
Gapu iti nasao a pammigbig a naawat ti lokal a gobyerno ti Baguio ken ti nasao a hotel ditoy siudad, maipaayanda iti libre a panakaital-o kadagiti websites ken social media platforms ti DOT ken ti Tourism Promotions Board malaksid pay kadagiti member organization ti World Travel and Tourism Council.
Maibasar iti rekord, ti Safe Travels Stamp ti nasao a konseho ti kaunaan a safety and hygiene stamp iti sangalubongan para kadagiti travelers tapnu mabigbigda dagiti gobyerno ken negosyo a nangadaptar iti global health standardized protocols kagiddan ti agdama a pandemya.
Manamnama met ti panangituloy dagiti nakaawat iti Safe Travels Stamp iti panagtungpalda kadagiti paglintegan kontra iti COVID-19.
