BAGUIO CITY – Nauram ti nasurok uppat nga ektarya a kabambantayan iti sakaanan ti Mt. Ulap sadiay Ampucao Itogon,Benguet iti malem kalman.
Iti panakiyuman ti Bombo Radyo kenni PCI Eugene Raymundo, hepe ti Itogon PNP, kinunana a ti laeng nauram ket ti paset ti asideg a bantay a sumrek iti Mt. Ulap.
Inyunay-unayna met saan a naapektaran dagiti trekking activities dagiti turista a naka-schedule a sumang-at iti nasao a bantay.
Kinunana a naawatda iti report mainaig iti panakauram ti bantay iti pasado ala una iti malem ken naideklara daytoy a fire-out babaen kadagiti kameng ti Itogon Fire Station iti alas singko ti malem.
Maibasar iti inisyal nga imbestigasion, lima nga indibidual ti responsable iti panakauram ti bantay.
Kinunana a manarimaan ti panagsapsapol dagiti lima nga indibidual iti “honey” wenno “diro” iti nasao a paset ti bantay idi posible a nakaregreg dagitoy iti ar-aramatenda a mangpa-asok kadagiti beehive wenno balay dagiti alimbubuyog.
Manarimaan metten ti panagsapol dagiti oulis kadagiti responsable nga indibidual a timmaray kalpasan ti nasao nga uram.
