BAGUIO CITY – Nabigbig dagiti frontliners ken healthcare workers iti probinsia ti Benguet kagiddan ti kick-off wenno panaglukat ti maika-121 a Foundation Anniversary ken Adivay ti probinsia.
Imbinsa ti gobernador ti probinsia dagiti sakripisyo dagiti frontliners ken healthcare workers nga agserserbi kas armas ken proteksion iti laban kontra iti pandemya gapu iti agtultuloy a panagwaras ti COVID-19.
Kinunana ti gobernador nga iti baet a napeggad ti biag dagitoy ket ipangpangrunada nga agserbi iti umili tapnu mataming dagiti nakaptan iti nasao a sakit.
Malaksid iti dayta, napagyamanan pay dagiti dadaulo dagiti munisipyo , opisyales ti probinsia ken dadduma pay nga instituusyon iti suportada nga agtalinaed a nasayaat ti COVID-19 response iti tunggal munisipyo ken intero a probinsia ti Benguet.
Maipalagip a pormalen a naglukat idi kalman ti Adivay babaen iti seremonya sadiay Benguet Provincial Capitol.
Nagduduma nga aktibidad ti nakapila para iti panakarambak daytoy, pakairamanan ti cañao wenno healing ritual ti Benguet a maisayangkat inton November 23.
