BAGUIO CITY–Puntirya ti Samahang Kickboxing ng Pilipinas a papigsaen pay ti kickboxing sports ditoy pagilian, partikular ditoy rehion Cordillera.
Iti interview ti Bombo Radyo kenni Bryan Olod, maysa nga International licensed Technical Official ti Kickboxing, imbinglayna nga isaksakad ti Philippine Olympic Committee ti panakainayon ti nasao a combative sport iti nasional a kompetisyon kas iti Palarong Pambansa ken Batang Pinoy.
Kinuna pay ti Co-founder ti KAFAGUAY MMA a mangisaysayangkat ti World Association of Kickboxing Organizations (WAKO) iti nagduduma a serye ti webinars dagiti technical officials ken coaches a pakataltlantanan dagiti officiating rules ti Kickboxing.
Itay laeng nabiit ket nakipaset ni Coach Bryan, kadwana ti dua pay a PIlipino, iti international webinar dagiti opisyal ti komite a kadwana ti agarup 100 nga opisyales ti WAKO iti intero a lubong.
Nupay kasta, inaklon ti opisyal ken mannursuro ti Sablan National High Schol a dakkel a karit ti mapaspasaran a pandemya gaputa ado dagiti naitantan ken nakaselar nga aktibidad dagitoy pakairamanan ti maisingsingasing a panakairaman ti Kickboxing iti national competitions.
Iti baet daytoy, agtultuloy latta ti panangital-o ti asosasyon iti nasao a combative sports nangruna ta ado dagiti agtartarigagay a sumrek iti ay-ayam.
Kinunana a maisaksakad metlaeng ti musical form ti Kickboxing a kas iti pomse ti Taekwondo.
Sadiay Sablan, Benguet a pagsursuruan ni Olod, kinunana nga adda dagiti sumagmamano nga ubbing a sansanayen daytoy nangruna dagiti asideg kadagiti pagadalan.
