Baguio City- Kinomendaran ni San Juan Mayor Francis Zamora ti lokal a gobierno ti Baguio City gapu iti kina-organisado ken kinapintas ti parada ti Panagbenga Festival.
Nagserbi ni Zamora kas maysa kadagiti inimbitaran ni Baguio City Mayor Benjamin Magalong a sangaili iti naisayangkat a Grand Floral Float Parade iti kalman, aldaw ti Dominggo.
Impeksa pay ti mayor ti tarigagay na a mapataray ken maimaton ti bukod dagitoy a festival idiay San Juan a Wattah Wattah Festival a kas kadakkel ken ka engrande ti Baguio Flower Festival.
Impeksa na pay ti komendasyon na kadagiti nagaramed iti float gapu iti kinaartistic ken kinalaeng da nga agaramed ti disenyo aramat ti pudpudno a sabsabong.
Kadwa ti mayor a nakiparada ti asawa na a ni Keri Neri nu sadino ket tawen 2001 idi nagkallaysa da ditoy Baguio City.
Ni Zamora ket nagbalin a miembro ti mayors for Good Governance idi tawen 2005 ken sakbay a nagbalin a politiko ket maysa isuna a nalatak a basketbolista ken nagay-ayam iti Philippine Basketball Association.//Bombo Jordan Tablac
