BAGUIO CITY – Impetteng ni DOH-Cordillera Regional Director Dr. Amelita Pangilinan nga adu pay nga impormasyon ti nasken nga alaenda tapnu malawlawagan ti pudno a detalye iti agwarwaras a damag a maysa nga empleyado ti state pension fund nga inmay ditoy Baguio City ti nagpositibo iti COVID-19 idi nakasangpet sadiay Manila.
Sigun kenkuana, karuruar laeng ti resulta ti test iti nasao nga indibidual isut gapuna nga awan iti master list dagiti COVID-19 positive a naawatna idi agsapa.
Inyunay-unayna nga adu a datus ti iberberipikarda kas iti nagalaan ti nasao nga indibidual iti coronavirus; no idi nagturong ditoy Baguio idi napalabas a lawas ket addaanen daytoy iti sintomas; ken no nagaramat ti protective gears bayat ti panakipulapol daytoy kadagiti kakadwana.
Dinakamatna metlaeng a saan a nailista kas patient under investigation ti nasao nga indibidual ken saan met nga inreport ti nagdagusan daytoy a hotel nangruna ta adda ti intedda a pagalagadan kadagiti accommodation stablishment kas iti panagala iti temperatura ken impormasyon iti biahe dagiti kliyente.
Maibasar iti agwarwaras a damag, addaan travel history sadiay Japan ti nasao nga indibidual a nagdagus iti maysa a hotel sadiay Camp John Hay.
Nupay kasta, kinumpirmar ni Mayor Benjamin Magalong ti panagpositibo iti COVID-19 ti nasao a sangaili isut gapuna nga imbilinnan ti panakikoordinar ti administrasyon ti maseknan a hotel kadagiti health authorities para iti panakaisayangkat ti umno ken kaskenan nga addang kas iti contact tracing.
Dinakamatna nga addan ti komunikasyonna iti administrasyon ti nasao a hotel ken naamuanna nga addan dagiti nag-self quarantine.
