Pimmusay ti sangapulo ket innem nga indibidual iti maysa a mall idiay China kalpasan a napasamak ti uram idi kalman.
Makita ti asok a nagwaras iti 14-story a pasdek idiay Zigong, Sichuan province nu sadino sumagmamano a tattao ti nagurnong iti balcony.
Dumanon iti trenta a katao ti narescue iti nasao a pasdek bayat nga agarup tallo gasut nga emergency workers ti naideploy para iti panakaispal dagitoy.
Maibasar iti preliminary nga imbestigasyon, ti uram ket nagtaud iti construction work.
Iti sabali a bangir, kiddaw ti China’s Ministry of Emergency Management ti panakaadal a dagus ti rason ti nasao nga uram kasta met ti panang-ammo nu anya dagiti wagas nga aramiden tapno maliklikan dagiti nasao nga insidente.
Maipalagip nga idi napalabas a bulan ti Enero ket napasamak ti uram iti maysa a pasdek idiay southeast China a nakatayan ti tallo pulo ket siyam a katao.
