BAGUIO CITY – Inaklon ni PMaj. Harriet Bulcio, panakangiwat ti Baguio City Police Office a sangapulo a police station ken uppat nga operating units ti awanan pay ti bukodna a lote a nakaipasdekan ti opisina dagitoy.
Iti interview ti Bombo Radyo kenkuana, dagiti lote a naipasdekan dagiti police station iti siudad ket kukua dagiti pribado a sektor nu sadino dagitoy ket dimmalan iti Memorandum of Agreement (MOA) para iti panakaaramatna.
Kabayatanna, kinuna ni PMaj. Bulcio a manarimaan ti panakaiproseso dagiti papeles ti lote ti dua a police station a pakairamanan ti headquarters para iti panakaaprobar ken panakaiyalis daytoy iti nagan ti Baguio City Police Office.
Nu sadino isu metlaeng ti maaramat a pakaibangonan ti istasyon dagitoy.
Inaklon pay ti opisyal a dakkel a karit kadakuada ti panakagun-od ti lote ken pondo ngem ar-aramidenda ti kabaelanda.
Malaksid iti dayta, marigatanda nga agbirok ti bakante a lote gapu ta kaadwan kadagitoy ket nagatangen.
Iti agdama, agur-uray paylaeng ti opisina ti maidonar a daga manipud iti city government, pribado a sektor ken barangays iti siudad.
Maipalagip a naipatungpal ti groundbreaking ceremony para iti panakaibangon ti opisina ti BCPO-Police Station 9 sadiay Irisan, Baguio City idi Mayo 7.//Bombo Jez Lapizar
